Fred de Haas, vershon papiamentu di Lucille Berry-Haseth
Isla de Gigantes[1],
Kuracan[2] ― Kòrsou
Kaminda arowakonan[3] a baha nan kanoa na awa
na Lagun[4] , rema, krusa laman bai topa nan famianan
na kosta firme enfrente,
e pais ku spañónan a yama
‘Venesia Chikí’: Venezuela.
Mi ta kanta di kurpa di bròns,
di dede na kòrá oker
ku ta pinta strepi[5] den e kuebanan di Aruba i Boneiru.
Arowakonan: ku nan a shi,
ora bota di ‘E reinan katóliko[6] a trapa riba nan’.
E komersiante di WIC[7]
na Áfrika ayá
a yag un nubia skur
di muhé, hòmber i mucha
pròp nan den bodega di barku ku ta hole stinki.
Na bordo mester tabatin kantamentu
di desesperashon, lágrima
ku a muha suela di tabla di e barku …
Mi ta kanta di e huvernùr[8] ya di edat
kende a skibi i lesa tantu
i ku derotá a despedí di Bahia di Santa Ana[9]
pa den e frialdat di Hulanda
e mira solo baha pa semper.
Mi ta kanta di e ansiano Vitali[10] ,
su wowonan típikamente hudiu
manando tristesa.
El a yena tereno pará bashí,
traha kas i biba un pa un den nan
te ora Morto a drenta
su último lugá di biba.
Mi ta kanta di e dòkter bieu[11]
ku su kòfi i su vishon
ku a alkansá universo
i kende niun hende no
a yega na komprend’é.
Despues di pensa basta riba tur kos
el a yega na un konklushon
i suspirá: ‘Tur kos ta tal-hí tal-há … meskos’.
Mi ta kanta tambe di e ansiano músiko
kende, sintá trankil riba stupi di Stroomzigt,
tabata kòrda Brionplein, e konsiertonan
ku ántes el a dirigí,
e walsnan ku el a komponé.
Mi ta kanta di muhénan hulandes[12]
kendenan na un isla den trópiko
tabata imaginá ku nan ta reina …
Mi ta kanta di e antiano simpel i bobo
ku su muhé blònt hulandes
kende no por kaba na komprendé ku e muhé ta ‘diferente’.
Mi ta kanta tambe di e pober muhé fo’i Hulanda
kende a kasa ku su Don Juan di Antia
pero no por kaba na kustumbrá ku e hòmber ta ‘diferente’.
Mi ta kanta di e ansiano Miguel
tokadó di pech’i kalumba[13] .
Su dedenan steif ta pipitá
i su stèm gastá ta kanta di ‘Ban Boneiru’.
Den su wowonan ya no tabatin bida
i den su bos, apénas rekuerdo di e tempu na Cuba[14]
i e trabou duru den e interminabel kamponan di kaña.
Mi ta kanta di Chan
kende tabata pone su benta kanta
riba rosea di bientu i kende
for di un palma den mi kurá
a kòrt’un kuèrdè.
Mi ta kanta di Corsen kende
ora ta sukuritu,
asombrá i insigur, ta skrudiñá
su sintimentunan.
Mi ta kanta pa tur hende
ku m’a stima.
Noten
[1] E konkistadónan spañó tabata asina impreshoná ku haltura di e habitantenan di Kòrsou, ku na 1499 Alonso de Ojeda a duna e isla nòmber di ‘Isla de Gigantes’. Riba mapanan bieu por topa e nòmbernan ‘Gigantes’ òf ‘Gigan’.
[2] Un nòmber bieu pa ‘Curaçao’. Na papiamentu, lenga vernákulo, e isla yama ‘Kòrsou’.
[3] Nòmber di habitantenan di e pais.
[4] Lugá na Kòrsou. Énfasis ta riba e di dos sílaba.
[5] E dibuhonan di koló kòrá den e kuebanan, ta di e poblashon di indjan Arowako.
[6] Fernando i Isabel di Castilla (1469-1516) kendenan a finansiá e biahe di Cristóbal Colón.
[7] Kompania di India Oksidental (1621) ku tabata hasi negoshi ku merkansia i katibu.
[8] Debrot (1902-1981). El a skibi e buki asina konosí’Mijn zuster de negerin’. El a baha komo gobernador despues di e lantamentu sosial na 1969.
[9] Boka di haf di Kòrsou.
[10] Vitali Cohen tabata un hudiu sefardí i doño di kas ku e outor di e poema akí tabata hür serka dje. Vitali a traha un kareda di kas na Professor Kernkampweg. E mes a supervisá konstrukshon di e kasnan i el a biba den kada un di nan.
[11] Dr Chris Engels (1907-1980) kende a biba ku su señora Lucila den e kas Stroomzigt. E tabata médiko i un artista talentoso. Na 1940 el a funda e revista De Stoep.
[12] E direktor di orkesta i kompositor Rudolf ― Shon Dòdò ― Boskaljon (1887-1970), tata di e pintor Lucila Engels-Boskaljon. Na 1939 el a funda e Orkesta Filarmóniko di Kòrsou ku el a dirigí durante 25 aña. El a komponé entre otro ‘Rhapsody Curaçao’.
[13] E ansiano Miguel tabata toka un instrumènt ku tabata parse un bleki grandi riba kua el a span un pida waya. Ku esaki e tabata kompañá su kantikanan. Un fragmento di e teksto ku a keda grabá serka mi ta mas o ménos asin’akí: ‘Pech’i Kalumba, tene mi lumba’. El a kanta tambe un kansion bieu ku ta kuminsá ku ‘Ban Boneiru’.
[14] Na prinsipio di siglo 20, hopi antiano a muda bai Cuba pa nan gana un poko plaka ku kòrtamentu di kaña den e kamponan di kaña di suku kubano.
